स्याङ्गजाका १०७ सहित गण्डकीका थप ६२७ जनामा कोरोना पुष्टि ।

पोखरा:
पछिल्लो २४ घण्टामा स्याङ्गजाका १०७ सहित गण्डकीका थप ६२७ जनामा कोरोना पुष्टि भएको छ। प्रदेश स्वास्थ्य निर्देशनालयको कोरोना सम्बन्धी विज्ञप्ति अनुसार पछिल्लो २४ घण्टामा गण्डकीका १ हजार १७५ जनामा गरिएको नमुना परीक्षणमा उक्त संख्याका मानिसको रिपोर्ट कोरोना पोजेटिभ आएको हो ।

बिहीबार संक्रमण पुष्टि हुनेमा गण्डकीका नौ जिल्लाका छन् । जसअन्तर्गत स्याङ्गजाका १०७ जना सहित कास्कीका २४१ जना, तनहुँका ६७ जना, गोरखाका ४१ जना, लमजुङका २६ जना र नवलपुरका ६० जना, पर्वतका चार जना, बाग्लुङका ३७ जना र म्याग्दी जिल्लाका ४४ जनाको परीक्षण रिपोर्ट कोरोना पोजेटिभ आएको निर्देशनालयले जनाएको छ। आज संक्रमण पुष्टि भएकासँगै गण्डकीमा कोरोना संक्रमितको कूल संख्या ९१ हजार ९८५ पुगेको छ ।

यस्तै पछिल्लो २४ घण्टामा गण्डकीबाट ७० जना संक्रमणमुक्त भएका छन् । योसँगै, प्रदेशमा संक्रमणमुक्त हुनेको संख्या ८७ हजार २१५ पुगेको छ। भने, अहिले प्रदेशभर ३३४० सक्रिय संक्रमित छन् ।

बिहीबार गण्डकीमा थप एक जनाको कोरोना संक्रमणका कारण मृत्यु पुष्टि भएको छ। मृत्यु हुनेमा गोर्खा जिल्ला पालुङटार नगरपालिका -२ निवासी ६९ वर्षीया वृद्धा छिन्। योसँगै, गण्डकीमा कोरोना संक्रमणका कारण ज्यान गुमाउनेको संख्या १४३० पुगेको निर्देशनालयले जनाएको छ ।

 

Facebook Comments Box
TOP