गण्डकीमा कोरोना संक्रमितको कूल संख्या १५ हजार ६ सय ७१ पुग्याे ।

स्याङजा : आइतबार गण्डकी प्रदेशमा थप २० जनामा कोरोना पुष्टि भएको छ ।

स्वास्थ्य निर्देशनालयद्वारा जारी विज्ञप्ति अनुसार आज गण्डकीका १४० जनामा गरिएको परीक्षणमा थप २० जनाको रिपोर्ट कोरोना पोजेटिभ आएको हो ।

आज पुष्टि भएका संक्रमित प्रदेशका पांच जिल्ला कास्की, तनहुँ, गोरखा, लमजुङ र म्याग्दीका छन् । जस अनुसार कास्कीको पोखरा महानगरमा ८, तनहुँमा ३, गोरखामा २, लमजुङमा ५ र म्याग्दी जिल्लाका २ जनाको रिपोर्ट पोजेटिभ आएको छ।

आज थपिएका संगै गण्डकीमा कोरोना संक्रमितको कूल संख्या १५ हजार ६ सय ७१ पुगेको छ । जसमा ३४५ सक्रिय संक्रमित छन् ।

पछिल्लो २४ घन्टामा गण्डकीबाट ३८ जना कोरोनामुक्त भएका छन् । यो संगै, प्रदेशमा कोरोनामुक्त हुनेको संख्या १५ हजार एक सय २३ पुगेको छ भने, अहिलेसम्म २०३ जनाले कोरोना संक्रमणकै कारण ज्यान गुमाईसकेका छन् ।